पुणे : पुणे महानगर परिवहन महामंडळाचे संचालक सिद्धार्थ शिरोळे यांना सिंगापूर येथे होणाऱ्या प्रतिष्ठीत अशा ग्लोबल मास ट्रान्झिटमध्ये सादरीकरण करण्यासाठी निमंत्रित करण्यात आले आहे. सिंगापूर येथे येत्या २२ व २३ ऑक्टोबर दरम्यान ही परिषद होणार असून, परिषदेत ‘क्लीन बसेस इन सिटीज इन एशिया पॅसिफिक’ या विषयावर चर्चा करण्यात येणार आहे.
एशिया पॅसिफिक खंडामध्ये सार्वजनिक वाहतुककोंडी, अपघात, प्रदूषण यांची समस्या गंभीर आहे. या प्रश्नावर उपाय म्हणून स्वच्छ बसेसची आवश्यकता आहे. या अंतर्गत सीएनजी, इलेक्ट्रिक, हायड्रोजन व हायब्रीड बसेसची संख्या वाढविण्याचा प्रयत्न करण्यात येत आहे. याबरोबरच या विषयात ज्या सार्वजनिक, खासगी संस्थांनी भरीव कामगिरी केली आहे, त्यांना त्यांचे अनुभव व त्यांनी केलेले प्रयोग मांडता यावेत, यासाठी या परिषदेचे आयोजन करण्यात आले आहे.
या परिषदेमध्ये पुणे महानगरपालिकेचे नगरसेवक व पुणे महानगर परिवहन महामंडळाचे संचालक सिद्धार्थ शिरोळे यांना आपले विचार मांडण्यासाठी निमंत्रित करण्यात आले आहे, ही शहराच्या दृष्टीने एक महत्त्वाची बाब आहे. पुणे महापालिकेच्या सेवेत दाखल होत असलेल्या इलेक्ट्रिक बसेस, महापालिकेच्या इमारतींवर बसविण्यात आलेले पवन, सौर हायब्रीड उर्जा प्रकल्प याबद्दल ते माहिती देतील. याबरोबरच या परिषदेमध्ये सध्या या क्षेत्रातील चालू घडामोडी, संधी आणि समस्या यांचा आढावादेखील सहभागी होणाऱ्यांना घेता येणार आहे.